*📍સુરતમાં સગીરા સાથે દુષ્કર્મ આચરી ભાગી છૂટેલા આરોપીને ગણતરીનાં કલાકોમાં અમદાવાદથી દબોચી લેતી ઇચ્છાપોર પોલીસ*

*📍સુરતમાં સગીરા સાથે દુષ્કર્મ આચરી ભાગી છૂટેલા આરોપીને ગણતરીનાં કલાકોમાં અમદાવાદથી દબોચી લેતી ઇચ્છાપોર પોલીસ*

મનિષ કંસારા

*સુરતઃ* સુરત શહેર પોલીસ કમિશનર અનુપમસિંહ ગેહલોત અને ઉચ્ચ પોલીસ અધિકારીઓ દ્વારા મહિલાઓ વિરુદ્ધ બનતા ગુનાઓ નાં આરોપીઓને તાત્કાલિક પકડી પાડવા માટે સૂચનાઓ આપવામાં આવી છે. આ સૂચનાઓ નાં અનુસંધાને સુરતનાં ઇચ્છાપોર પોલીસ સ્ટેશનની ટીમે સક્રિયતા દાખવી ગંભીર ગુનાનાં એક આરોપીને પકડવામાં સફળતા મેળવી છે.

આ કેસની વિગત મુજબ, ઇચ્છાપોર વિસ્તારમાં રહેતી એક સગીર વયની બાળકી સાથે આરોપીએ સોશિયલ મીડિયાના માધ્યમથી સંપર્ક કેળવ્યો હતો. આરોપીએ સગીરાને લલચાવી-ફોસલાવી તેની સાથે અવારનવાર શારીરિક સંબંધ બાંધ્યા હતાં. આ બાબતની જાણ સગીરાના પરિવારને થતા તેઓએ પોલીસનો સંપર્ક કર્યો હતો, જે દરમિયાન આરોપી નાસી છૂટ્યો હતો.

ઘટનાની ગંભીરતાને ધ્યાને રાખી ઇચ્છાપોર પોલીસ સ્ટેશનમાં બી.એન.એસ. ૨૦૨૩ ની વિવિધ કલમો તેમજ પોક્સો (POCSO) એક્ટ હેઠળ ગુનો દાખલ કરવામાં આવ્યો હતો. પોલીસ ઇન્સ્પેક્ટર એ. સી. ગોહિલના માર્ગદર્શન હેઠળ તાત્કાલિક અલગ-અલગ ટીમો બનાવી ટેકનિકલ એનાલિસિસ અને હ્યુમન સોર્સિસ દ્વારા આરોપીનું લોકેશન મેળવવાની તજવીજ હાથ ધરવામાં આવી હતી.

તપાસ દરમિયાન બાતમી મળી હતી કે આરોપી મોહમ્મદ સાજીદ ઉર્ફે અહદ (ઉં.વ. ૨૩) તેના વતન ભાગી જવાની ફિરાકમાં છે. પોલીસે ટેકનિકલ સર્વેલન્સનાં આધારે પીછો કરીને આ આરોપીને અમદાવાદ ખાતેથી ગણતરીનાં કલાકોમાં ઝડપી પાડ્યો હતો. આરોપી મૂળ બિહારનો વતની હોવાનું જાણવા મળ્યું છે અને હાલ પોલીસ તેના રિમાન્ડ મેળવવાની તજવીજ કરી રહી છે.

આ કામગીરીમાં પોલીસ ઇન્સ્પેક્ટર એ. સી. ગોહિલ સાથે આસિસ્ટન્ટ હેડ કોન્સ્ટેબલ રમેશભાઈ મેરામણભાઈ, આસિસ્ટન્ટ હેડ કોન્સ્ટેબલ કવિતભાઇ મનુભાઈ તથા આસિસ્ટન્ટ પોલીસ કોન્સ્ટેબલ બહાદુરભાઈ રણજીતભાઈએ પ્રશંસનીય ભૂમિકા ભજવી હતી. પોલીસની આ ત્વરિત કાર્યવાહીથી ગુનેગારોમાં ફફડાટ વ્યાપી ગયો છે અને લોકોમાં સુરક્ષાની ભાવના પ્રબળ બની છે.

*સાવચેતી જ સુરક્ષા: સોશિયલ મીડિયાના ઉપયોગમાં સતર્કતા જરૂરી*

​વર્તમાન સમયમાં સોશિયલ મીડિયાનો વ્યાપ વધતા બાળકો અજાણતા જ અજાણ્યા લોકોનાં સંપર્કમાં આવી જતા હોય છે, જે ક્યારેક ગંભીર ગુનાઓનું કારણ બને છે. વાલીઓએ ખાસ તકેદારી રાખવી જોઈએ કે તેમના બાળકો ઇન્ટરનેટ પર કોની સાથે વાતચીત કરે છે અને કયા પ્રકારનાં પ્લેટફોર્મનો ઉપયોગ કરે છે. બાળકોએ પણ અજાણી વ્યક્તિ દ્વારા આપવામાં આવતી લાલચ કે મિત્રતાની ઓફરથી દૂર રહેવું જોઈએ. જો કોઈ વ્યક્તિ દબાણ કરે અથવા અયોગ્ય માંગણી કરે, તો તુરંત જ ગભરાયા વગર માતા-પિતા કે પોલીસનો સંપર્ક કરવો હિતાવહ છે. તમારી જાગૃતતા જ આવા ગુનાખોરોને જેલનાં સળિયા પાછળ ધકેલવામાં મદદરૂપ થઈ શકે છે.

#icmnews