*📍વાપી ટાઉન પોલીસ સ્ટેશનના પ્રોહિબિશન ગુનાનો વોન્ટેડ આરોપી સુરતથી ઝડપાયો: મહિધરપુરા પોલીસની સફળ કામગીરી*

*📍વાપી ટાઉન પોલીસ સ્ટેશનના પ્રોહિબિશન ગુનાનો વોન્ટેડ આરોપી સુરતથી ઝડપાયો: મહિધરપુરા પોલીસની સફળ કામગીરી*

મનિષ કંસારા

*સુરત:* સુરત શહેર પોલીસ કમિશનર અનુપમસિંહ ગહલૌત અને સેક્ટર-01ના અધિક પોલીસ કમિશનર બલરામ મીણા દ્વારા નાસતા-ફરતા વોન્ટેડ આરોપીઓને પકડી પાડવા માટે કડક સૂચનાઓ આપવામાં આવી હતી. આ સૂચનાના અનુસંધાને ઝોન-3ના નાયબ પોલીસ કમિશનર રાઘવ જૈન અને ‘ઇ’ ડિવિઝનના મદદનીશ પોલીસ કમિશનર આર. આર. આહીર નાં માર્ગદર્શન હેઠળ મહિધરપુરા પોલીસ સ્ટેશનની સર્વેલન્સ ટીમ સક્રિય બની હતી.

મહિધરપુરા પોલીસ સ્ટેશનના સિનિયર પોલીસ ઇન્સ્પેક્ટર એન. એચ. બ્રહ્મભટ્ટ અને સેકન્ડ પોલીસ ઇન્સ્પેક્ટર યુ. જે. જોષીની આગેવાનીમાં સર્વેલન્સ સ્ટાફ દ્વારા વોન્ટેડ આરોપીઓની શોધખોળ હાથ ધરવામાં આવી હતી.

આ દરમિયાન સર્વેલન્સ સ્ટાફના હેડ કોન્સ્ટેબલ પૃથ્વીસિંહ કનુભાઈ અને પોલીસ કોન્સ્ટેબલ મહાવીરસિંહ અનિરુદ્ધસિંહને મળેલી ચોક્કસ બાતમીનાં આધારે વાપી ટાઉન પોલીસ સ્ટેશનમાં નોંધાયેલા પ્રોહિબિશનના ગુનામાં લાંબા સમયથી વોન્ટેડ એવા આરોપીને ઝડપી પાડવામાં સફળતા મળી છે.

પકડાયેલ આરોપીની ઓળખ ભાવેશ ઉર્ફે ભાવેશ કુકડો (ઉં.વ. 33, રહે. બોમ્બે કોલોની, કાપોદ્રા, સુરત) તરીકે થઈ છે, જે મૂળ ભાવનગર જિલ્લાનાં તળાજા તાલુકાનાં ભદ્રાવળ ગામનો વતની છે. આરોપી સામે વાપી ટાઉન પોલીસ સ્ટેશનમાં પ્રોહિબિશન એક્ટની વિવિધ કલમો હેઠળ ગુનો નોંધાયેલો હતો. પોલીસની પ્રાથમિક તપાસમાં બહાર આવ્યું છે કે પકડાયેલ આરોપી રીઢો ગુનેગાર છે અને તેની સામે વરાછા, મહુવા, કડોદરા GIDC અને કાપોદ્રા પોલીસ સ્ટેશનમાં પ્રોહિબિશન અને જુગાર ધારા હેઠળ અગાઉ 8 જેટલા ગુનાઓ નોંધાઈ ચૂક્યા છે.

આ સફળ કામગીરીમાં સર્વેલન્સ પીએસઆઈ એસ. એ. આસનાની, એએસઆઈ અજીતસિંહ માનસિંહ, હેડ કોન્સ્ટેબલ પ્રતાપસિંહ ભીખુભાઇ, પૃથ્વીસિંહ કનુભાઈ, ચિંતનકુમાર ચંદુભાઇ, જીગરકુમાર લક્ષ્મણભાઇ તેમજ પોલીસ કોન્સ્ટેબલ મહાવીરસિંહ અનિરુદ્ધસિંહ અને હિતેશભાઈ પરખાભાઇએ ટીમ વર્કથી શ્રેષ્ઠ દેખાવ કર્યો છે. પોલીસની આ ત્વરિત કાર્યવાહીથી ગુનાખોરી આચરતા તત્વોમાં ફફડાટ વ્યાપી ગયો છે.

મહિધરપુરા પોલીસની આ કામગીરી ગુનાખોરી ડામવા અને કાયદો-વ્યવસ્થા જાળવી રાખવા પ્રત્યેની તેમની પ્રતિબદ્ધતા દર્શાવે છે. પકડાયેલ આરોપીનો કબજો મેળવીને વાપી ટાઉન પોલીસને સોંપવાની તજવીજ હાથ ધરવામાં આવી છે, જેથી આગળની કાયદેસરની કાર્યવાહી પૂર્ણ કરી શકાય.

#icmnews