*📍સુરત: ભેસ્તાનમાંથી સગીરાનું અપહરણ કરનાર શખ્સને ગણતરીનાં કલાકોમાં દબોચી લેતી પોલીસ*

*📍સુરત: ભેસ્તાનમાંથી સગીરાનું અપહરણ કરનાર શખ્સને ગણતરીનાં કલાકોમાં દબોચી લેતી પોલીસ*

*➡️૧૦૦થી વધુ પોલીસ કર્મીઓ અને ૧૫૦થી વધુ CCTV કેમેરાની તપાસ બાદ ક્રાઇમ બ્રાન્ચ અને ભેસ્તાન પોલીસને મળી મોટી સફળતા.*

*ગુજરાત ની વાચા*

રીપોર્ટ: મનિષ કંસારા

*સુરત:* શહેરનાં ભેસ્તાન વિસ્તારમાં રહેતી એક સગીર વયની બાળકીનાં અપહરણના ગુનાનો સુરત ક્રાઇમ બ્રાન્ચ અને ભેસ્તાન પોલીસે સંયુક્ત ઓપરેશન હાથ ધરી ગણતરીનાં કલાકોમાં ભેદ ઉકેલી નાખ્યો છે. પોલીસે ભોગ બનનાર બાળકીને હેમખેમ છોડાવી આરોપી મોહમદ મુમતાઝ શેખને ઝડપી પાડ્યો છે.

ઘટનાની વિગત એવી છે કે; ગત તારીખ ૧૪/૦૨/૨૦૨૬ના રોજ ઉન ભીંડીબજાર વિસ્તારમાં રહેતા નાજીમખાન લતીફખાનની સગીર પુત્રી ઘરનો કચરો નાખવા જવાનું કહી નીકળ્યા બાદ પરત ફરી ન હતી. કોઈ અજાણ્યો શખ્સ તેને પટાવી-ફોસલાવી અપહરણ કરી ગયો હોવાની ફરિયાદ ભેસ્તાન પોલીસ સ્ટેશનમાં નોંધાઈ હતી. મામલાની ગંભીરતાને જોતા પોલીસ કમિશનર અને ઉચ્ચ અધિકારીઓએ તાત્કાલિક તપાસનાં આદેશ આપ્યા હતા.

આ કેસ ઉકેલવા માટે ભેસ્તાન પોલીસ, ક્રાઇમ બ્રાન્ચ, ડીંડોલી, સચીન અને સચીન GIDC પોલીસ સ્ટેશનની અલગ-અલગ ટીમો બનાવવામાં આવી હતી. ૧૦૦થી વધુ પોલીસ અધિકારીઓ અને કર્મચારીઓ આ ઓપરેશનમાં જોડાયા હતા. તપાસ દરમિયાન રેલવે સ્ટેશન, બસ સ્ટેશન અને બગીચા જેવા જાહેર સ્થળોએ સઘન સર્ચ કરવામાં આવ્યું. આશરે ૧૫૦ થી ૨૦૦ જેટલા CCTV કેમેરાના ફૂટેજ તપાસવામાં આવ્યા. સોશિયલ મીડિયા અને કંટ્રોલ રૂમ દ્વારા બાળકીનાં ફોટા સાથેની માહિતી પ્રસારિત કરવામાં આવી.

ટેકનિકલ સર્વેલન્સ અને હ્યુમન ઇન્ટેલિજન્સની મદદથી પોલીસે ગણતરીનાં કલાકોમાં આરોપી મોહમદ મુમતાઝ મોહમદ જહાંગીર શેખ (ઉં.વ.૨૬, રહે. લિંબાયત, મૂળ બિહાર) ને ઝડપી પાડ્યો હતો.

આરોપી વિરુદ્ધ BNS ની કલમ ૧૩૭(૨), ૭૫(૨) તથા પોક્સો એક્ટ (POCSO) હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. ઉલ્લેખનીય છે કે આરોપી અગાઉ અમદાવાદનાં ઇસનપુર પોલીસ સ્ટેશનમાં પણ ગુનાહિત ઇતિહાસ ધરાવે છે.

સુરત પોલીસની આ ત્વરિત અને સતર્ક કામગીરીએ સાબિત કર્યું છે કે ગુનેગારો ગમે તેટલા શાતિર હોય, કાયદાનાં હાથથી બચી શકતા નથી. માત્ર ગણતરીનાં કલાકોમાં માસૂમ બાળકીને શોધી કાઢી પોલીસે પ્રશંસનીય ઉદાહરણ પૂરું પાડ્યું છે.

આ સફળ કામગીરીમાં પોલીસ ઇન્સ્પેક્ટર એ. એન. ગાબાણી, પી.એસ.આઈ. એચ. બી. ચૌધરી, ભેસ્તાન સર્વેલન્સ ટીમ, ક્રાઇમ બ્રાન્ચ અને ઝોન-૬ નાં પોલીસ સ્ટાફનો મહત્વનો ફાળો રહ્યો હતો.

#indiacrime #mirror