ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા ધોરણ-10 (SSC) પરીક્ષા 2026નું પરિણામ આવતીકાલે એટલે કે 6 મેના રોજ સવારે 8 વાગ્યે જાહેર કરવામાં આવશે. રાજ્યભરના લાખો વિદ્યાર્થીઓ માટે આ મહત્વપૂર્ણ ક્ષણ રહેશે.
આ પરીક્ષા 26 ફેબ્રુઆરીથી 16 માર્ચ દરમિયાન યોજાઈ હતી, જેમાં 15 લાખથી વધુ વિદ્યાર્થીઓએ ભાગ લીધો હતો. વિદ્યાર્થીઓ બોર્ડની સત્તાવાર વેબસાઈટ gseb.org પર જઈને પોતાનો બેઠક ક્રમાંક દાખલ કરીને પરિણામ જાણી શકશે.
વિદ્યાર્થીઓ માટે ખાસ સુવિધા રૂપે WhatsApp દ્વારા પણ પરિણામ મેળવવાની વ્યવસ્થા કરવામાં આવી છે. વિદ્યાર્થીઓ પોતાનો બેઠક નંબર 6357300971 પર મોકલીને તરત જ પોતાનું પરિણામ મેળવી શકશે.
બોર્ડ દ્વારા આપવામાં આવેલી માહિતી અનુસાર ગુણપત્રક અને પ્રમાણપત્ર શાળાઓમાં મોકલવા અંગેની વિગતવાર સૂચનાઓ પછી આપવામાં આવશે. જો કોઈ વિદ્યાર્થીને પરિણામ બાદ ગુણચકાસણી કરાવવી હોય તો તે માટે ઓનલાઈન અરજી કરવાની રહેશે.
આ ઉપરાંત નામ સુધારા તથા પૂરક પરીક્ષા 2026 માટેના ફોર્મ સંબંધિત માહિતી પણ ટૂંક સમયમાં બોર્ડની સત્તાવાર વેબસાઈટ પર ઉપલબ્ધ કરાવવામાં આવશે.
