*રાજકોટમાં આંતરરાષ્ટ્રીય મહિલા દિવસની ભવ્ય ઉજવણી: ૧૦૦૦ દીકરીઓએ માર્શલ આર્ટ્સ દ્વારા બતાવ્યું નારી શક્તિનું સામર્થ્ય*
રાજકોટ, સંજીવ રાજપૂત, એબીએનએસ: ‘આંતરરાષ્ટ્રીય મહિલા દિવસ’ નિમિત્તે શ્રી કસ્તુરબા હાઈસ્કૂલ ખાતે નારી શક્તિના સન્માન અને પ્રોત્સાહન માટે એક ભવ્ય ‘માર્શલ આર્ટ્સ ટેલેન્ટ શો’ અને ‘મહિલા સન્માન સમારોહ’નું આયોજન કરવામાં આવ્યું હતું.
રાજકોટ મવડી પોલીસ હેડ ક્વાર્ટરમાં જી.આર.ડી. (GRD) તરીકે ફરજ બજાવતા રાજવીર મકવાણા દ્વારા આ વિશેષ કાર્યક્રમનું આયોજન કરવામાં આવ્યું હતું. સમાજની સુરક્ષા અને દીકરીઓના આત્મવિશ્વાસમાં વધારો કરવાના હેતુથી, રાજવીરભાઈએ શહેરની વિવિધ સ્કૂલ અને હોસ્ટેલની કુલ ૧૦૦૦ જેટલી દીકરીઓને સંપૂર્ણપણે નિ:શુલ્ક (કોઈ પણ ફી લીધા વગર) સેલ્ફ ડિફેન્સની તાલીમ આપી હતી.
નોંધનીય છે કે રાજવીર મકવાણા અત્યાર સુધીમાં ૭૦૦૦ થી વધુ મધ્યમ વર્ગની બહેનોને સ્વ-બચાવની તાલીમ આપી ચુક્યા છે.
આ કાર્યક્રમમાં દીકરીઓને પ્રોત્સાહિત કરવા માટે રાજકોટ ક્રાઇમ બ્રાન્ચના DCP જગદીશ બાંગરવા તથા જિલ્લા પોલીસ વડા વિજયસિંહ ગૂર્જર સાહેબ દ્રારા ખાસ સહયોગ મળ્યો હતો. તેમણે દીકરીઓના કૌશલ્યને બિરદાવ્યું હતું અને પોલીસ વિભાગ તરફથી સહયોગ પૂરો પાડ્યો હતો. એડવોકેટ ચીમનભાઈ સાકરીયાની પણ હાજરી આપી હતી.જેમણે સામાજિક જવાબદારીના ભાગરૂપે આ કાર્યમાં યોગદાન આપ્યું હતું.
આ કાર્યક્રમ દરમિયાન ભાગ લેનાર તમામ દીકરીઓને તેમની શક્તિ અને સાહસ બદલ મેડલ અને સર્ટિફિકેટ આપી સન્માનિત કરવામાં આવી હતી. રાજકોટ પોલીસ તરફથી વિજેતા અને પ્રતિભાશાળી દીકરીઓને ઇનામો એનાયત કરવામાં આવ્યા હતા.
કાર્યક્રમને સફળ બનાવવા માટે એડવોકેટ ચીમનભાઈ સાકરીયા, મહિલા પોલીસ સ્ટેશન – ‘સી’ ટીમ (SHE Team), ભક્તિનગર પોલીસ – ‘સી’ ટીમ, માલવીયા નગર પોલીસ ટીમ, તાલુકા પોલીસ ટીમ, ઉપસ્થિત મહેમાનો અને પોલીસ ટીમ જેવા વિભાગો અને મહાનુભાવોએ હાજરી આપી હતી.
આ કાર્યક્રમે સાબિત કર્યું કે જો દીકરીઓને યોગ્ય માર્ગદર્શન અને તાલીમ મળે, તો તેઓ આત્મનિર્ભર બની પોતાની અને સમાજની રક્ષા કરવા સક્ષમ છે. સમગ્ર કાર્યક્રમમાં દીકરીઓનો ઉત્સાહ જોરદાર રહ્યો હતો.
