*વલસાડમાં DRIનો મેગા ઑપરેશન: અટગામમાંથી ₹22 કરોડનું અલ્પ્રાઝોલમ ડ્રગ્સ બનાવતી ગુપ્ત ફેક્ટરી ઝડપાઈ*
*વલસાડ:* ડાયરેક્ટોરેટ ઓફ રેવન્યુ ઇન્ટેલિજન્સ (DRI)ની ટીમે વલસાડ જિલ્લાનાં અટગામ વિસ્તારમાં એક મોટી અને ગુપ્ત કાર્યવાહી હાથ ધરીને ડ્રગ્સ બનાવતી ગેરકાયદેસર ફેક્ટરીનો પર્દાફાશ કર્યો છે. ‘ઑપરેશન વ્હાઇટ કૉલ્ડ્રન’ કોડનેમ હેઠળ DRIએ પ્રતિબંધિત સાયકોટ્રોપિક પદાર્થ અલ્પ્રાઝોલમ (Alprazolam) નો વિશાળ જથ્થો જપ્ત કર્યો છે.
DRIના અધિકારીઓએ ચોક્કસ બાતમીનાં આધારે 4 નવેમ્બર, 2025ના રોજ આ ફેક્ટરી પર દરોડો પાડ્યો હતો. આ દરોડામાં કુલ 114 કિલોગ્રામ (કિગ્રા) પ્રવાહી સ્વરૂપનો ડ્રગ્સનો જથ્થો જપ્ત કરવામાં આવ્યો છે, જેની આંતરરાષ્ટ્રીય બજારમાં અંદાજિત કિંમત ₹22 કરોડથી વધુ આંકવામાં આવી છે. જપ્ત થયેલા જથ્થામાં 9.55 કિલોગ્રામ તૈયાર અલ્પ્રાઝોલમ અને 104.15 કિલોગ્રામ અર્ધ-તૈયાર (Semi-finished) ડ્રગ્સનો સમાવેશ થાય છે.
આ ગેરકાયદેસર ડ્રગ્સ ફેક્ટરીનું સંચાલન કરી રહેલા બે માલિકો અને બે વર્કર્સ સહિત કુલ ચાર વ્યક્તિઓની ધરપકડ કરવામાં આવી છે. ફેક્ટરીના મુખ્ય માલિકો તરીકે અશોક પીઠડીયા અને ચંદ્રકાંત છેડાની ઓળખ કરવામાં આવી છે. આ આરોપીઓ સામે NDPS એક્ટ હેઠળ ગુનો નોંધી, રિમાન્ડ મેળવીને DRI દ્વારા સઘન પૂછપરછ કરવામાં આવી રહી છે.
પ્રાથમિક તપાસમાં જાણવા મળ્યું છે કે આ ફેક્ટરીમાં ઉત્પાદિત થતું અલ્પ્રાઝોલમ ડ્રગ્સ ગુજરાતમાં નહીં, પરંતુ તેલંગાણા રાજ્યમાં સપ્લાય થવાનું હતું. DRIના અધિકારીઓ માને છે કે આ પદાર્થનો ઉપયોગ ત્યાંનાં સ્થાનિક પીણા ‘તાડી’ (Toddy) માં ભેળવવા માટે થવાનો હતો. આરોપીઓ પાસેથી રિએક્ટર, સેન્ટ્રીફ્યુજ, રેફ્રિજરેશન યુનિટ સહિત ઔદ્યોગિક કક્ષાનાં પ્રોસેસિંગ ઉપકરણો તેમજ 431 કિલોગ્રામ જેટલો કાચો માલ પણ જપ્ત કરવામાં આવ્યો છે, જેનાંથી સ્પષ્ટ થાય છે કે આ ફેક્ટરી મોટા પાયે ગેરકાયદેસર ઉત્પાદન કરી રહી હતી.
DRIની આ સફળ કાર્યવાહીને કારણે આંતરરાજ્ય ડ્રગ્સ ટ્રાફિકિંગના નેટવર્કને મોટો ફટકો પડ્યો છે.
#news #icm
