🌸જૈન વિજ્ઞાન-ધર્મકથા-૮૫:

🌸જૈન વિજ્ઞાન–ધર્મકથા–૮૫:

સંઘાટ: ધન્ય સાર્થવાહના આ સ્પષ્ટીકરણથી ભદ્રા હૃષ્ટ-તુષ્ટ અને આનંદચિત્ત થઇ, હર્ષથી તેનું હૃદય વિકસિત થઇ ગયું. તે આસનથી ઊઠી, તેને ભેટી પડી અને તેના ક્ષેમ કુશળ પૂછયા. ત્યારપછી સ્નાન કરી તેમજ વિભૂષિત થઇને પાંચે ઇન્દ્રિયોના વિપુલ ભોગ ભોગવતી રહેવા લાગી.

વિજય ચોરની દુર્ગતિ :
ત્યારપછી વિજય ચોર કારાગૃહમાં બંધન, વધ, ચાબુકોના પ્રહાર સહન કરતો તેમજ તૃષા (તરસ) અને ક્ષુધા (ભૂખ)થી પીડિત થતો, મૃત્યુના સમયે મૃત્યુ પામીને નરકમાં નારકી રૂપે ઉત્પન્ન થયો. ત્યાં ઉત્પન્ન થયેલો તે કાળો, અતિશય કાળો તેમજ નરકસંબંધી વેદનાનો અનુભવ કરી રહ્યો છે. તે નરકમાંથી નીકળી અનાદિ અનંત દીર્ઘકાલીન ચતુર્ગતિરૂપ સંસાર અટવી (ઘનઘોર જંગલ)માં પરિભ્રમણ કરશે.
ધન્ય સાર્થવાહની પ્રવ્રજ્યા અને સદ્ગતિ :
તે કાલે અને તે સમયે ધર્મઘોષ નામના સ્થવિર (૨૦ વર્ષથી વધારે દીક્ષા પર્યાયવાળા) ભગવંત હતા. તે જાતિ સંપન્ન, કુલ સંપન્ન તેમજ અનુક્રમથી ચાલતાં, ગ્રામાનુગ્રામ વિચરતાં અને સુખપૂર્વક વિહાર કરતાં રાજગૃહ નગરના ગુણશીલ ઉદ્યાનમાં પધાર્યા અને યથાયોગ્ય ઉપાશ્રયની યાચના (વિનંતી, માંગણી) કરીને ત્યાં સંયમ અને તપથી પોતાના આત્માને ભાવિત કરતાં રહ્યા. તેમનું આગમન જાણીને પરિષદ (સભા) નીકળી, ધર્મઘોષ સ્થવિરે દેશના આપી.
ત્યારપછી ઘણા લોકો પાસેથી આ વૃત્તાંત સાંભળીને, હૃદયમાં ધારણ કરીને ધન્ય સાર્થવાહને વિચાર આવ્યો તેમજ મનોગત સંકલ્પ ઉત્પન્ન થયો કે જાતિ સંપન્ન કુલ સંપન્ન વગરે ગુણોથી યુક્ત સ્થવિર ભગવાન અહીં પધાર્યા છે, અહીં બિરાજિત થયા છે, તો હું ત્યાં જઇને સ્થવિર ભગવાનને વંદના નમસ્કાર કરું. આ પ્રમાણે વિચાર કરી ધન્ય સાર્થવાહે સ્નાન કર્યું તેમજ સભામાં પહેરવા યોગ્ય શુદ્ધ, ઉત્તમ, માંગલિક વસ્ત્રો ધારણ કર્યા અને પગપાળા ગુણશીલ ચૈત્યમાં સ્થવિર ભગવંતો પાસે આવીને વંદના-નમસ્કાર કરીને પર્યુપાસના કરવા લાગ્યા. ત્યારપછી સ્થવિર ભગવંતોએ ધન્ય સાર્થવાહને તથા ઉપસ્થિત વિશાળ પરિષદને અદ્ભુત ધર્મનો ઉપદેશ આપ્યો. જિનાજ્ઞા વિરાધના થઇ હોય તો ત્રિવિધે ત્રિવિધે કરી મિચ્છામિ દુક્કડમ્!