*શહેરી વિકાસ મંત્રી અને સાંસદના હસ્તે અમદાવાદ સિવિલ હોસ્પિટલમાં રૂ. 2 કરોડના અદ્યતન CO₂ લેઝર મશીનનું કરાયું લોકાર્પણ*
*અમદાવાદ, સંજીવ રાજપૂત, એબીએનએસ* અમદાવાદ સિવિલ હોસ્પિટલના ENT વિભાગમાં દર્દીઓને વધુ આધુનિક, અસરકારક અને ગુણવત્તાસભર સારવાર ઉપલબ્ધ કરાવવાના હેતુથી *રૂ. 2 કરોડની કિંમતના અદ્યતન CO₂ Laser Machineનું આજે લોકાર્પણ કરવામાં આવ્યું. આ અત્યાધુનિક મશીન **એરપોર્ટ્સ ઓથોરિટી ઓફ ઈન્ડિયા (AAI) ના CSR* સહયોગ હેઠળ ઉપલબ્ધ બન્યું છે, જે અમદાવાદ સિવિલ હોસ્પિટલના આરોગ્ય માળખાને વધુ મજબૂત બનાવશે.
અમદાવાદ સિવિલ હોસ્પિટલના સુપ્રિટેન્ડન્ટ ડૉ. રાકેશ જોષીએ આ મહત્વપૂર્ણ આરોગ્યસેવા પ્રકલ્પ માટે ગુજરાત રાજ્ય સરકાર, ભારત સરકાર, એરપોર્ટ્સ ઓથોરિટી ઓફ ઈન્ડિયા (AAI), સાંસદ દિનેશભાઈ મકવાણા તેમજ સહયોગી સંસ્થાઓનો હૃદયપૂર્વક આભાર વ્યક્ત કર્યો હતો. તેમણે જણાવ્યું હતું કે આ અદ્યતન મશીનથી સરકારી હોસ્પિટલમાં સારવાર લેતા હજારો દર્દીઓને વિશ્વસ્તરીય ENT સારવારનો લાભ મળશે અને અમદાવાદ સિવિલ હોસ્પિટલની આરોગ્યસેવાની ક્ષમતામાં વધુ વધારો થશે.*
આ મહત્વપૂર્ણ આરોગ્યસેવા પ્રકલ્પનું લોકાર્પણ ગુજરાત રાજ્યના શહેરી વિકાસ અને શહેરી ગૃહ નિર્માણ મંત્રી શ્રીમતી દર્શનાબેન મુકેશભાઈ વાઘેલા તથા અમદાવાદ પશ્ચિમના લોકસભા સાંસદ શ્રી દિનેશભાઈ મકવાણાના શુભ હસ્તે કરવામાં આવ્યું હતું..
સાંસદ દિનેશભાઈ મકવાણાના પ્રયાસો અને માર્ગદર્શન હેઠળ એરપોર્ટ્સ ઓથોરિટી ઓફ ઈન્ડિયાના CSR માધ્યમથી પ્રાપ્ત થયેલ આ અદ્યતન મશીન ENT વિભાગ માટે એક સીમાચિહ્નરૂપ ઉમેરો સાબિત થશે. આ પ્રોજેક્ટનો અમલ R.K. HIV & AIDS Research & Care Centre (NGO) દ્વારા કરવામાં આવ્યો છે.
આ અદ્યતન CO₂ Laser Machineની સ્થાપનાથી ENT વિભાગની સારવાર ક્ષમતામાં નોંધપાત્ર વધારો થશે અને દર વર્ષે હજારો દર્દીઓને તેનો સીધો લાભ મળશે.
આ નવી સુવિધા માત્ર એક મશીન નહીં, પરંતુ દર્દીકેન્દ્રિત આરોગ્યસેવા, આધુનિક ટેક્નોલોજી અને જનકલ્યાણ પ્રત્યેની પ્રતિબદ્ધતાનું ઉત્તમ ઉદાહરણ છે. રાજ્ય સરકાર, ભારત સરકાર, એરપોર્ટ્સ ઓથોરિટી ઓફ ઈન્ડિયા તથા વિવિધ સહયોગી સંસ્થાઓના સંયુક્ત પ્રયાસોથી દર્દીઓને વધુ સુલભ, સુરક્ષિત અને ગુણવત્તાસભર આરોગ્યસેવા ઉપલબ્ધ કરાવવાના પ્રયાસોને નવી દિશા મળશે.
