*પગારના વિવાદમાં માનવતા નેવે મૂકાઈ: ફિલ્ડ ઓફિસરને પટ્ટા વડે ફટકાર્યો, સાત શખ્સો વાડજ પોલીસ સકંજામાં*
અમદાવાદ, સંજીવ રાજપૂત, એબીએનએસ: નવરંગપુરાની એક હાઉસકીપિંગ કંપનીમાં પગાર ન મળવા જેવી સામાન્ય બાબતે મોટું સ્વરૂપ ધારણ કર્યું છે. બાકી પગારના મુદ્દે ઉશ્કેરાયેલા કર્મચારીઓએ તેમના જ ફિલ્ડ સુપરવાઈઝરનું અપહરણ કરી, તેને બેરહેમીથી માર માર્યો હોવાની ઘટના સામે આવી છે.
નવરંગપુરામાં આવેલી હાઉસ કીપિંગ કંપનીમાં ફિલ્ડ ઓફિસર તરીકે રાજ બારોટ કામ કરતો હતો.રાજે તેના બે મિત્રોને પણ નોકરીએ રખાવ્યા હતા પરંતુ, તેમનો પગાર બાકી હોવાથી અવારનવાર વિવાદ સર્જાતો હતો. ૨૪મી માર્ચના રોજ જ્યારે ફિલ્ડ ઓફિસર રાજ બારોટ નોકરી પૂરી કરીને ઘરે જઈ રહ્યા હતા, ત્યારે કેટલાક શખ્સોએ તેમને ફોન કરીને ભીમજીપુરા બોલાવ્યા હતા. ત્યાંથી તેમનું ગાડીમાં અપહરણ કરવામાં આવ્યું હતું.આરોપીઓ રાજને ચાંદલોડિયા રેલવે સ્ટેશન પાસેના ખુલ્લા મેદાનમાં લઈ ગયા હતા. ત્યાં લાકડીઓ અને પટ્ટા વડે તેમને ઢોર માર મારવામાં આવ્યો હતો.હુમલાખોરોએ ભોગ બનનાર પાસે માફી મંગાવતો એક વીડિયો પણ ઉતાર્યો હતો, જે સોશિયલ મીડિયા પર વાયરલ કરીને પોતાની ધાક જમાવવાનો પ્રયાસ કર્યો હતો.આ સમગ્ર મામલે વાડજ પીઆઇ વી એમ ડાંગર અને ટીમે ત્વરિત કાર્યવાહી હાથ ધરી છે. પોલીસે અપહરણ અને રાયોટિંગ જેવી કલમો હેઠળ ગુનો નોંધીને કુલ સાત આરોપીઓને ઝડપી પાડ્યા છે જે આ પ્રમાણે 1વિશાલ વાણીયા. 2નયન સાગડીયા. 3પિન્ટુ મકવાણા. 4હર્ષ મોભ
5મિહીર મોભ. 6અન્ય બે સગીર આરોપીઓ
આ ઘટનામાં રાજ બારોટે તેના મિત્રોને નોકરીએ રખાવ્યા હતા, પરંતુ પગાર અટવાયેલો હોવાને કારણે આ વિવાદ હિંસક બન્યો હોવાનું પ્રાથમિક તપાસમાં બહાર આવ્યું છે.
