*📍સુરતની સારોલી પોલીસે હથિયારોની હેરાફેરીનો નેટવર્ક તોડ્યો; દેશી પિસ્તોલ સાથે બે આરોપીની ધરપકડ* *➡️દેશી બનાવટની પિસ્તોલ સાથે બે રીઢા ગુનેગારોને ઝડપી પાડી શહેરની શાંતિ ડહોળવાનો પ્રયાસ નિષ્ફળ*

સુરતઃ સુરત શહેર પોલીસ દ્વારા ગુનેગારો અને ગેરકાયદે હથિયારો રાખતા ઈસમો વિરુદ્ધ ચલાવવામાં આવી રહેલી કડક ઝુંબેશને વધુ એક મોટી સફળતા મળી છે. સારોલી પોલીસ સ્ટેશનની ટીમે બાતમીનાં આધારે ઓપરેશન પાર પાડીને એક દેશી બનાવટની પિસ્તોલ સાથે બે રીઢા ગુનેગારોને ઝડપી પાડી શહેરની શાંતિ ડહોળવાનો પ્રયાસ નિષ્ફળ બનાવ્યો છે.

પોલીસ કમિશનર અનુપમસિંહ ગહલૌત અને અન્ય ઉચ્ચ અધિકારીઓની સૂચના મુજબ, હથિયારોની હેરાફેરી રોકવા માટે સારોલી પોલીસ સતર્ક હતી. આ દરમિયાન પી.આઈ. એસ. આર. વેકરીયા નાં માર્ગદર્શન હેઠળ સર્વેલન્સ સ્ટાફ નિયોલ ચેક પોસ્ટ પાસે વાહન ચેકિંગમાં હતો. ત્યારે ખાનગી બાતમી મળી હતી કે કડોદરા તરફથી એક ઈસમ બેગમાં પિસ્તોલ લઈને સુરત આવી રહ્યો છે.

બાતમીનાં આધારે પોલીસે વોચ ગોઠવીને ૨૧ વર્ષીય વૈભવ સંજય ઇગલે (રહે. પુણે, મહારાષ્ટ્ર) ને ઝડપી પાડ્યો હતો. તેની તલાશી લેતા તેની પાસેથી ₹૧૦,૦૦૦ની કિંમતની એક દેશી હાથ બનાવટની પિસ્તોલ અને ₹૧૦,૦૦૦ની કિંમતનો મોબાઈલ ફોન મળી આવ્યો હતો. પોલીસે કુલ ₹૨૦,૦૦૦નો મુદ્દામાલ કબજે કરી આરોપીની સઘન પૂછપરછ હાથ ધરી હતી.

પકડાયેલા આરોપી વૈભવની પૂછપરછમાં બહાર આવ્યું હતું કે, આ પિસ્તોલ સુરતનાં અંકિત માર્કંડેય ઉપાધ્યાયે મંગાવી હતી અને બિહારનાં મુંગેર નાં સૌરભ યદુવંશી નામનાં શખ્સે તેને પહોંચાડી હતી. આ માહિતી મળતા જ પોલીસ હરકતમાં આવી હતી અને પિસ્તોલ મંગાવનાર મુખ્ય સૂત્રધારની શોધખોળ શરૂ કરી હતી.

પોલીસે ટેકનિકલ સર્વેલન્સ અને ‘ઈ-ગુજકોપ’ (e-GujCop) ડેટાબેઝની મદદ લીધી હતી. જેમાં અંકિત ઉપાધ્યાયનો ગુનાહિત ઇતિહાસ સામે આવ્યો હતો. પોલીસે તેને ઓળખી કાઢી હ્યુમન સોર્સિસની મદદથી ભેસ્તાન આવાસ પાસેથી ઝડપી પાડ્યો હતો. આ કામગીરી દ્વારા પોલીસે હથિયાર સપ્લાય કરનાર અને મેળવનાર વચ્ચેની કડી તોડી પાડી છે.

પકડાયેલ આરોપી અંકિત ઉપાધ્યાય અગાઉ પણ અનેક ગંભીર ગુનાઓમાં સંડોવાયેલો હોવાનું ખૂલ્યું છે. તેના વિરુદ્ધ ઉમરા, ડીંડોલી અને ઉધના પોલીસ સ્ટેશનમાં મારામારી, હત્યાની કોશિશ અને જાહેરનામા ભંગ જેવા અડધો ડઝન જેટલા ગુના નોંધાયેલા છે, તેમજ તે અગાઉ ‘પાસા’ હેઠળ જેલની હવા પણ ખાઈ ચૂક્યો છે.

આ સમગ્ર સફળ ઓપરેશનમાં સારોલી પોલીસના પી.એસ.આઈ. એસ.આર. રાણા, હેડ કોન્સ્ટેબલ વિપુલસિંહ, વિલેશભાઈ અને અન્ય સર્વેલન્સ સ્ટાફનાં કર્મચારીઓએ ટીમ વર્ક થી પ્રશંસનીય કામગીરી કરી છે. હાલ પોલીસે બિહારનાં હથિયાર સપ્લાયર સૌરભ યદુવંશીને વોન્ટેડ જાહેર કરી તેને પકડવા નાં ચક્રો ગતિમાન કર્યા છે.