બિઝનેસ સેન્ટરમાં આગ: ‘લેવલ-II’ કટોકટી જાહેર, એરિયલ લેડરથી બચાવ કામગીરી, ઇલેક્ટ્રિકલ ફોલ્ટની શંકા
મુંબઈ: મુંબઈનાં જોગેશ્વરી પશ્ચિમ વિસ્તારમાં આવેલ SV રોડ પરનાં બહુમાળી ‘JMS બિઝનેસ સેન્ટર’માં આજે સવારે 10:50 વાગ્યે આગ લાગવાની ઘટના બની હતી. આગનું પ્રમાણ વધતાં મુંબઈ ફાયર બ્રિગેડે તાત્કાલિક ‘લેવલ-II’ (મેજર) કટોકટી જાહેર કરી હતી.
આગની જાણ થતાં જ ઘટનાસ્થળે પાંચ ફાયર ટેન્ડર, પોલીસ ટુકડીઓ અને મ્યુનિસિપલ ટીમોનો કાફલો પહોંચી ગયો હતો. બિલ્ડિંગ નાં ઉપરનાં માળેથી ગાઢ ધુમાડાનાં ગોટેગોટા બહાર નીકળી રહ્યા હતા. આ પરિસ્થિતિમાં ઉપરનાં માળ પર ફસાયેલા લોકોને સુરક્ષિત બહાર કાઢવા માટે અગ્નિશામકોએ ‘એરિયલ લેડર’ (હવાઈ સીડી)નો ઉપયોગ કરીને બચાવ કામગીરી હાથ ધરી હતી.
સદભાગ્યે, આ ઘટનામાં કોઈ વ્યક્તિને ઈજા થઈ હોવાના કે કોઈ જાનહાનિના સમાચાર નથી.
પ્રાથમિક તપાસમાં અધિકારીઓને શંકા છે કે આગ લાગવાનું કારણ ઇલેક્ટ્રિકલ ખામી હોઈ શકે છે. હાલમાં આગને સંપૂર્ણપણે ઓલવવાની કામગીરી ચાલુ છે અને આગ લાગવાનાં ચોક્કસ કારણની જાણકારી મેળવવા માટે વધુ તપાસ હાથ ધરવામાં આવી રહી છે.
