*ભાદરવી પૂનમ મહામેળો – ૨૦૨૬*
*અંબાજી મહામેળામાં “સ્વચ્છતા ત્યાં પ્રભુતા” હેઠળ વિશેષ સફાઈ ઝુંબેશ*
અંબાજી, સંજીવ રાજપૂત, એબીએનએસ: “આસ્થા તમારી, વ્યવસ્થા અમારી”ના મંત્ર સાથે અંબાજી ખાતે ભાદરવી પૂનમ મહામેળો-૨૦૨૬ ધામધૂમપૂર્વક ચાલી રહ્યો છે. લાખોની સંખ્યામાં માઈભક્તો અને પદયાત્રીઓ મા અંબાના દર્શનાર્થે અંબાજી તરફ આવી રહ્યા છે ત્યારે મેળા દરમિયાન સ્વચ્છતા જળવાઈ રહે તે માટે જિલ્લા વહીવટી તંત્ર દ્વારા વિશેષ સ્વચ્છતા વ્યવસ્થા ઉભી કરવામાં આવી છે.
ભાદરવી પૂનમ મહામેળા દરમિયાન “સ્વચ્છતા ત્યાં પ્રભુતા”ના મંત્ર સાથે સમગ્ર મેળા વિસ્તારમાં ૨૪ કલાક સફાઈ કામગીરી હાથ ધરવામાં આવી રહી છે. જિલ્લા વિકાસ અધિકારી એમ.જે. દવેના માર્ગદર્શન હેઠળ અંબાજી, ગબ્બર અને આસપાસના સમગ્ર વિસ્તારને પાંચ ઝોનમાં વિભાજિત કરી શિફ્ટવાઈઝ અંદાજે ૨,૦૦૦ જેટલા સફાઈ મિત્રો સતત ફરજ બજાવી રહ્યા છે. સફાઈ કામગીરીનું સુચારુ સંચાલન અને સતત મોનિટરિંગ થાય તે માટે વિવિધ વિભાગોના અધિકારીઓ અને કર્મચારીઓને પણ જવાબદારી સોંપવામાં આવી છે.
જિલ્લા વિકાસ અધિકારી એમ.જે. દવેએ જણાવ્યું હતું કે, “અંબાજીના ભાદરવી પૂનમ મહામેળામાં લાખો શ્રદ્ધાળુઓ ઉમટી પડતા હોવાથી સ્વચ્છતા જાળવવી અત્યંત મહત્વપૂર્ણ બની રહે છે. સ્વચ્છતાની કામગીરી સુચારુ રીતે થાય તે માટે અંબાજી, ગબ્બર અને આસપાસના સમગ્ર વિસ્તારને પાંચ ઝોનમાં વિભાજિત કરવામાં આવ્યો છે. આ પાંચેય ઝોનમાં શિફ્ટવાઈઝ અંદાજે ૨,૦૦૦ જેટલા સફાઈ મિત્રો ૨૪ કલાક કામગીરી કરી રહ્યા છે. આ કામગીરીના મોનિટરિંગ માટે તાલુકા વિકાસ અધિકારી, ચીફ ઓફિસર, વન વિભાગના અધિકારીઓ-કર્મચારીઓ તેમજ ડેપ્યુટી એન્જિનિયર સહિતના અધિકારીઓ અને કર્મચારીઓ સતત કામગીરી પર નજર રાખી રહ્યા છે.”
જિલ્લા વિકાસ અધિકારીશ્રીએ વધુમાં જણાવ્યું હતું કે, ભાદરવી પૂનમ મહામેળામાં પદયાત્રાનું વિશેષ મહત્વ હોવાથી અંબાજી તરફ આવતા વિવિધ પદયાત્રી માર્ગો પર પણ વિશેષ સફાઈ વ્યવસ્થા કરવામાં આવી છે. બનાસકાંઠા જિલ્લાની હદ શરૂ થાય ત્યાંથી તેમજ પાલનપુરથી અંબાજી તરફના વિવિધ રૂટ પર ટ્રેક્ટર અને શ્રમિકોની ટીમ દ્વારા દિવસ-રાત સફાઈ કામગીરી કરવામાં આવી રહી છે. દિવસ દરમિયાન આશરે ૮૦થી ૮૨ ટ્રેક્ટર સાથે પાંચ-પાંચ શ્રમિકો કાર્યરત રહે છે, જ્યારે રાત્રિના સમયે પણ આશરે ૪૦ ટ્રેક્ટર દ્વારા સફાઈ કામગીરી હાથ ધરવામાં આવે છે. ઉપરાંત સમગ્ર મેળા વિસ્તાર અને પદયાત્રી માર્ગો માટે અલગ-અલગ વ્યૂહરચના બનાવી ૨૪ કલાક સ્વચ્છતા કામગીરી અને તેનું સતત મોનિટરિંગ કરવામાં આવી રહ્યું છે. ઉપરાંત, આ વર્ષે પદયાત્રી માર્ગો પર પણ સ્વચ્છતા જળવાઈ રહે તે માટે થોડા-થોડા અંતરે મોટી ડસ્ટબીન મૂકવામાં આવી છે. પદયાત્રીઓ આ ડસ્ટબીનનો ઉપયોગ કરે તે માટેની વ્યવસ્થા કરવામાં આવી છે, જેથી કચરો રસ્તા પર ન પડે અને સમગ્ર યાત્રામાર્ગ તેમજ મેળા વિસ્તાર સ્વચ્છ અને સુઘડ જળવાઈ રહે.
મેળા દરમિયાન સફાઈ કર્મચારીઓ દ્વારા વિવિધ શિફ્ટમાં સતત કામગીરી કરવામાં આવી રહી છે. ટ્રેક્ટર સહિતના સાધનોના માધ્યમથી એકત્રિત કચરાનો નિયમિત નિકાલ કરવામાં આવી રહ્યો છે. અંબાજી શહેર, ગબ્બર વિસ્તાર તેમજ અંબાજી તરફ આવતા વિવિધ પદયાત્રી માર્ગો પર સફાઈની કામગીરીને પ્રાથમિકતા આપવામાં આવતા સમગ્ર યાત્રામાર્ગ પર સ્વચ્છતા જળવાઈ રહે તે માટે તંત્ર દ્વારા સતત પ્રયાસો કરવામાં આવી રહ્યા છે.
આ રીતે “સ્વચ્છતા ત્યાં પ્રભુતા”ના સંદેશને સાકાર કરતાં વહીવટી તંત્ર અને સફાઈ મિત્રો દ્વારા ૨૪ કલાક કરવામાં આવી રહેલી કામગીરીથી ભક્તો માટે સ્વચ્છ, સુઘડ અને સુવ્યવસ્થિત યાત્રા વાતાવરણ ઊભું કરવામાં આવી રહ્યું છે.
