*📍બનાસકાંઠા LCBને મોટી સફળતા: અંબાજી, ઇડર અને રાજસ્થાનનાં મંદિરોમાં ચોરી કરનાર ગેંગ ઝડપાઈ*

*📍બનાસકાંઠા LCBને મોટી સફળતા: અંબાજી, ઇડર અને રાજસ્થાનનાં મંદિરોમાં ચોરી કરનાર ગેંગ ઝડપાઈ*

મનિષ કંસારા

*​પાલનપુર:* બનાસકાંઠા લોકલ ક્રાઈમ બ્રાન્ચ (LCB) એ એક મોટી કાર્યવાહી કરતા અંબાજી પોલીસ સ્ટેશન વિસ્તાર સહિત વિવિધ જગ્યાએ થયેલ ઘરફોડ અને મંદિર ચોરીના ગુનાઓનો ભેદ ઉકેલી નાખ્યો છે. ટેકનિકલ સર્વેલન્સ અને હ્યુમન સોર્સની મદદથી પોલીસે કુલ ૩ ઇસમોની ધરપકડ કરી તેમની પાસેથી ૧૨૫૨ ગ્રામ ચાંદીના દાગીના અને રોકડ રકમ સહિત કુલ રૂ. ૧,૮૬,૬૩૧/- નો મુદ્દામાલ જપ્ત કર્યો છે.

બનાસકાંઠા પોલીસની આ ત્વરિત અને સચોટ કાર્યવાહીથી પંથકમાં ભય ફેલાવનાર તત્વોમાં ફફડાટ વ્યાપી ગયો છે. જિલ્લા પોલીસ વડા અને ઉચ્ચ અધિકારીઓનાં માર્ગદર્શન હેઠળ LCB ટીમે અત્યંત વ્યવસાયિક રીતે તપાસ કરી ટૂંકા ગાળામાં ગુનેગારોને જેલનાં સળિયા પાછળ ધકેલી પ્રજાની સુરક્ષા પ્રત્યેની પોતાની પ્રતિબદ્ધતા ફરી એકવાર સાબિત કરી છે.

​ઘટનાની વિગત એવી છે કે, અંબાજી પોલીસ સ્ટેશનમાં નોંધાયેલ ચોરીનાં ગુનાનાં અનુસંધાને LCB પી.આઈ. એ. વી. દેસાઈ અને તેમની ટીમ પેટ્રોલિંગમાં હતી. તે દરમિયાન બાતમીનાં આધારે શંકાસ્પદ ઈસમો ની પૂછપરછ કરતા તેઓએ અંબાજી, ઇડર અને રાજસ્થાનનાં દાનબોરા ગામે થયેલ ચોરીની કબૂલાત કરી હતી.

*​ઝડપાયેલ આરોપીઓ:* (૧) સરદારભાઈ ભારમાભાઈ ડુંગાચીયા (રહે. જેતવાસ, તા. દાંતા) (૨) ગોવાભાઈ ભારમાભાઈ ડુંગાચીયા (૩) શંકરભાઈ ભુરાભાઈ ખરાડી

પોલીસે આરોપીઓ પાસેથી ચાંદીનાં કડા, ઝાંઝરી, પાયલ, કંદોરો, સિક્કા અને ઘુઘરી જેવી વિવિધ ચીજવસ્તુઓ મળી કુલ ૧૨૫૨ ગ્રામ ચાંદી કબ્જે કરી છે. હાલ અંબાજી પોલીસ સ્ટેશન ખાતે ભારતીય ન્યાય સંહિતાની વિવિધ કલમો હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.

#icmnews