આઈપીએલ ટાઈટલ સ્પોન્સર ભારતનું ટોચનું ઉદ્યોગજૂથ તાતા ગ્રુપ આ વર્ષથી ઈન્ડિયન પ્રીમિયર લીગમાં ટાઈટલ સ્પોનસર તરીકે જોડાશે

ભારતનું ટોચનું ઉદ્યોગજૂથ તાતા ગ્રુપ આ વર્ષથી ઈન્ડિયન પ્રીમિયર લીગમાં ટાઈટલ સ્પોનસર તરીકે જોડાશે. તાતા ગ્રુપ ચાઈનીઝ મોબાઈલ કંપની વીવોને હટાવીને તેનું સ્થાન લેશે તેવો સત્તાવાર નિર્ણય આઈપીએલની ગર્વનિંગ કાઉન્સિલની મંગળવારે મળેલી બેઠકમાં લેવાયો હતો.આઈપીએલના ચેરમેન બ્રેજિશ પટેલ આઈપીએલના ટાઈટલ સ્પોન્સર તરીકે તાતા ગ્રુપની એન્ટ્રી થવાની પુષ્ટિ કરી છે. તાતા ગ્રુપના પ્રવક્તાએ પણ આ વાતને સમર્ન આપ્યું હતું જો કે કેટલી રકમમાં ડીલ થઈ છે તે જણાવવાનો તેમણે ઈન્કાર કર્યો હતો. અગાઉ ચાઈનીઝ મોબાઈલ કંપની વીવોએ 2018-22માં આઈપીએલ ટાઈટલ સ્પોન્સર હક માટે રૂ. 2,200 કરોડની ડીલ કરી હતી. પરંતુ 2020માં ગલવાન ઘાટીમાં ભારત અને ચીનના સૈનિકો વચ્ચે ઘર્ષણ થતા તેનું સ્થાન ડ્રીમ-11એ લીધું હતું.ત્યારબાદ 2021માં વીવોની આઈપીએલમાં પુનઃ એન્ટ્રી થઈ હતી. વીવોએ પોતાના હકો યોગ્યો બિડરને વેચવા મંજૂરી માંગી હતી અને બીસીસીઆઈએ તેને માન્ય રાખી હતી. ભારતીય ક્રિકેટ બોર્ડના એક સૂત્રએ નામ ગુપ્ત રાખવાની શરતે જણાવ્યું કે, વહેલા મોડું આ થવાની સંભાવના હતી. વીવોની હાજરીથી લીગ તેમજ કંપની બન્ને માટે આ ખરાબ પ્રસિદ્ધિને આમંત્રિત કરતું હોવાથી ડીલ પૂર્ણ થવાને એક વર્ષ બાકી હોવા છતાં આ નિર્ણય લેવાયો છે.બોર્ડને આ સોદાથી કોઈ નુકશાન નહીં થાય કારણ કે, નવા સ્પોન્સર દ્વારા પણ તેને વાર્ષિક રૂ.440 કરોડની ખાતરી મળી છે. સ્પોન્સરશિપમાંથી મળતી આવક પૈકી બોર્ડ 50 ટકા પોતાની પાસે રાખે છે જ્યારે બાકીની રકમ ફ્રેન્ચાઈઝમાં વહેંચે છે. તાતા સાથે ફક્ત આ વર્ષની સ્પોન્સશિપ માટે કરાર થયો હોવાનું સૂત્રએ જણાવ્યું છે. આ સીઝન બાદ બોર્ડ આગામી 2023 માટે નવા સ્પોન્સર્સ પાસેથી બિડ મંગાવશે.