*📍ગુજરાતનાં દક્ષિણ અને સૌરાષ્ટ્રનાં વિસ્તારોમાં ભારે વરસાદની આગાહી: હવામાન વિભાગ દ્વારા ‘રેડ એલર્ટ’ જાહેર*

*📍ગુજરાતનાં દક્ષિણ અને સૌરાષ્ટ્રનાં વિસ્તારોમાં ભારે વરસાદની આગાહી: હવામાન વિભાગ દ્વારા ‘રેડ એલર્ટ’ જાહેર*

*ગુજરાત ની વાચા*

મનિષ કંસારા

*ગુજરાત:* ભારત સરકારનાં હવામાન વિભાગ (IMD) દ્વારા ગુજરાતનાં વિવિધ વિસ્તારો માટે અત્યંત ભારે વરસાદની ચેતવણી આપવામાં આવી છે. આગામી ૨૪ કલાક માટે ‘રેડ એલર્ટ’ જાહેર કરવામાં આવ્યું છે, જેમાં ખાસ કરીને દક્ષિણ ગુજરાત અને સૌરાષ્ટ્રનાં દરિયાકાંઠાનાં વિસ્તારોને સૌથી વધુ અસર થવાની શક્યતા વ્યક્ત કરવામાં આવી છે. આ ચેતવણી આજે ૨ જુલાઇના રોજ બપોરે ૩:૧૮ વાગ્યાથી શરૂ થઈને ૩ જુલાઇના રોજ બપોરે ૩:૧૩ વાગ્યા સુધી અમલમાં રહેશે.

હવામાન વિભાગની આગાહી મુજબ, દાદરા અને નગર હવેલી, દમણ અને દીવ જેવા કેન્દ્રશાસિત પ્રદેશો ઉપરાંત ગુજરાતનાં ભરૂચ, ભાવનગર, ગીર સોમનાથ, જૂનાગઢ, નવસારી, પોરબંદર, સુરત અને વલસાડ જિલ્લાઓમાં છૂટાછવાયા સ્થળોએ અત્યંત ભારે વરસાદ પડવાની પ્રબળ શક્યતા છે. આ વિસ્તારોમાં વહીવટી તંત્રને સાવચેત રહેવા અને સંભવિત પરિસ્થિતિને પહોંચી વળવા માટેની તૈયારીઓ રાખવા સૂચના આપવામાં આવી છે.

ભારે વરસાદની આ આગાહીને પગલે સ્થાનિક વહીવટી તંત્ર દ્વારા નાગરિકોને ખાસ સાવચેતી રાખવા વિનંતી કરવામાં આવી છે. સ્ટેટ ડિઝાસ્ટર મેનેજમેન્ટ ઓથોરિટી (SDMA) ની માર્ગદર્શિકાનું ચુસ્તપણે પાલન કરવું અનિવાર્ય છે. નીચાણવાળા વિસ્તારોમાં રહેતા લોકોને સુરક્ષિત સ્થળે ખસી જવા અને નદી-નાળા કે દરિયાકિનારાના વિસ્તારોમાં ન જવા માટે સૂચના આપવામાં આવી છે.

પ્રશાસન દ્વારા પરિસ્થિતિ પર સતત નજર રાખવામાં આવી રહી છે અને જરૂર પડે તો તાત્કાલિક રાહત અને બચાવ કામગીરી માટે ટીમોને સ્ટેન્ડ-બાય રાખવામાં આવી છે. નાગરિકોને અફવાઓથી દૂર રહેવા અને હવામાન વિભાગ દ્વારા આપવામાં આવતી સત્તાવાર માહિતી અને સૂચનાઓનું જ અનુસરણ કરવા માટે અનુરોધ કરવામાં આવ્યો છે. આ કટોકટી નાં સમયમાં સાવધ રહીને સુરક્ષિત રહેવું જ શ્રેષ્ઠ ઉપાય છે.

#icmnews