‘હીટ ગર્લ’ નામની આત્મકથામાં એક્ટ્રેસ આશા પારેખ તેની હતાશા અને ચિંતાની વાત કરે છે. એ લખે છે, “મારી માતાના ગયા પછી મારા પિતા સાવ ચુપ જ થઇ ગયા હતા. યાદદાસ્ત પણ નો’તી. ૨૦૦૩માં એ પણ જતા રહ્યા, મને પહેલીવાર થયું કે મારે કોઈ ભાઈ-બહેન હોવાં જોઈતાં હતાં. ખાલી ઘર મને ખાવા ધાતુ હતું. જીવનનો કોઈ અર્થ જ રહ્યો ન હતો. બીમાર વિચારો આવતા અને ગભરામણ થતી. મને થતું હતું કે હું પાગલ થઇ રહી છું.
એક દિવસે એટલો બધો ઉચાટ ઘેરી વળ્યો કે મેં વહીદા (રહેમાન)ને ફોન કરીને કહ્યું કે મને થાય છે કે ઘરની બાલ્કનીમાંથી નીચે કુદી જાઉં. વહીદા ગભરાઈ ગઈ અને મને ધમકાવી, “બેકાર વાત ના કર. મને વચન આપ કે તું આવા વિચાર બંધ કરી દઈશ.’ બીજા દિવસે એ મારી પાસે આવી, અને કહ્યું કે- આશા, તું કસમ ખા, તું એકલી છું, એવું નહીં વિચારે. મને ક્યારેક વિચાર આવે છે કે હું તે દિવસે કુદી ગઈ હોત તો?”
આશા પારેખ ૭૪ વર્ષની છે, અને વહીદા રહેમાન ૮૧ વર્ષની છે. આશા સિંગલ છે, એટલે આ ઉંમરે પરિવારની ગેરહાજરી સાલે, તે સ્વાભાવિક છે, પણ એમ તો બાળકો મોટાં થઇ જાય અને ખુદની દુનિયામાં જીવવા લાગે, તો સપરિવાર વ્યક્તિને પણ મોટી ઉંમરે એકલતા સતાવે જ. એમાંય તમે સિનેમાની ચકાચાંધમાં જીવ્યા હો, અને અચાનક તાળીઓનો ગડગડાટ બંધ થઇ જાય, કેમેરાની ફ્લેશ લાઈટ અદ્રશ્ય થઇ જાય, ટેલીફોન સુના થઇ જાય, લોકોની ભીડ વિખરાઈ જાય અને તમારી ઉપયોગીતા ખતમ થઇ જાય, તો ભલભલા સ્ટારનું જીવન આકરું થઇ જાય. એટલા માટે જ આશા પારેખની સરખામણીમાં વહીદા રહેમાને તેની ૮૧ વર્ષની ઉંમરે જે ‘નવું’ શરુ કર્યું છે, તે કોઈપણ સિનિયર સિટિઝન માટે ઉદાહરણરૂપ છે.
એવું કહે છે કે શોખની કોઈ ઉંમર નથી હોતી. એમાંય મોટી ઉંમરમાં તો શોખનો અને સ્વાસ્થ્ય વચ્ચે સીધો સંબંધ છે. કેલિફોર્નિયા યુનિવર્સીટીના સાઈકોલોજી વિભાગના પ્રોફેસર ડો. રચેલ વોએ એક અભ્યાસમાં કહ્યું છે કે મોટી ઉંમરમાં નવો હુન્નર શીખવાથી, છ જ સપ્તાહમાં તમારું મગજ ત્રણ દાયકા જેટલું યુવાન થઇ જાય છે. વૈજ્ઞાનિકો કહે છે કે યાદદાસ્ત ઓછી થવી, નિર્ણયશક્તિ ધીમી થઇ જવી અને બોલવામાં મુશ્કેલી આવે છે તેવા મોટી ઉંમરની અલ્ઝેઈમરની બીમારીમાં ફોટોગ્રાફી, સંગીત, પેઇન્ટિંગ કે લખવા જેવા શોખ મગજના પાવરને મજબુત બનાવે છે.
વરિષ્ઠ એક્ટ્રેસ, વહીદા રહેમાન, ૮૧ વર્ષની ઉંમરે આ જ તો કરે છે. હા, વહીદા રહેમાન છેલ્લા છ વર્ષથી વાઈલ્ડ લાઈફ ફોટોગ્રાફી કરે છે, અને તેમની સાથેના ૨૪ ફોટોગ્રાફરો (જેમાં સૌથી નાનો ઉંમરનો ફોટોગ્રાફર ૧૮ વર્ષનો, અને સૌથી મોટી ઉંમરનાં વહીદા છે)નું એક પ્રદર્શન પણ મુંબઈમાં યોજાઈ ગયું છે.
વહીદાને કેમેરાનો શોખ તો વર્ષોથી હતો, પરંતુ જંગલોમાં જઈને પ્રાકૃતિક જીવનની ફોટોગ્રાફી કરવાનું હમણાં જ શરુ કર્યું છે. તેમની પાસે બહુ શરૂઆતના રોલેઈફ્લેસ્ક અને પેન્ટેક્સ સહિતના ૨૫ કેમેરા છે. અત્યારે તે ઓલિમ્પસ કેમરા વાપરે છે. વહીદા કહે છે, “હું મને મારા પતિ (સ્વર્ગસ્થ શશી રેખી) હનીમૂન માટે ન્યૂયોર્કમાં હતા, ત્યારે તેમને મારા માટે ગિફ્ટ ખરીદવી હતી. મેં કહ્યું કે પેન્ટેક્સ ખરીદો, તો એ અચંભિત થઇ ગયા. મારે એમને કહેવું પડ્યું કે છોકરીનો અસલી દોસ્ત ડાયમન્ડ નહીં, કેમેરા હોય.”
વહીદા રહેમાન, હિમાંશુ ચંદ્રકાંત શેઠ નામના એક ગુજરાતી વાઈલ્ડ લાઈફ અને લેન્ડસ્કેપ ફોટોગ્રાફર પાસેથી ફોટોગ્રાફીની તકનીક શીખ્યાં છે. “મારી ફોટોગ્રાફીમાં બહુ ભલીવાર નથી,” વહીદા કહે છે, “પણ મને બહુ પહેલેથી વાઈલ્ડ લાઈફ ફોટોગ્રાફીમાં રસ હતો. હિમાંશુ શેઠ મારા ગુરુ છે. છ-સાત વર્ષ પહેલાં હું તેમને મળી હતી, જે મને સફારી પર લઇ જતા હતા, તેમાંથી આ સિલસિલો શરુ થયો. અમે આ તસ્વીરો માટે પુરા ભારત, તાન્ઝાનિયા, નામિબિયા, કેન્યા, આસામ અને અરુણાચલ પ્રદેશમાં ભટક્યા છીએ.”
હિમાંશુ શેઠ કહે છે, “ફોટોગ્રાફી શીખવાની વહીદાજીની બહુ જૂની ઈચ્છા હતી, પણ તેને વિકસાવવાની સરખી તક મળતી ન હતી. હું તેમના દીકરા, સોહેલ માટે, એક નાનકડું શૂટ કરતો હતો. એને ખબર પડી કે હું ફોટોગ્રાફી ટુર કરું છું, તેણે તરત મને કહ્યું કે તેની માતાને ફોટો સફારી પર આવવાનું અને ફોટોગ્રાફી શીખવાનું ગમશે. એ વાતને છથી વધુ વર્ષ થઇ ગયાં. દરેક પ્રવાસમાં અમારું બંધન વધુ મજબુત થાય છે.”
ઉંમરની વાતમાં વહીદા કહે છે, “ભારતમાં લોકોને ઉંમરને લઈને બહુ વાંધા હોય છે. ‘આ ઉંમરે તેણે આવું બધું કરવાની શું જરૂર છે?’ એવું લોકો પૂછ-પૂછ કરે. આ માનસિકતા બદલવાની જરૂર છે. તમારામાં થનગનાટ હોય, અને મન ખુલ્લું હોય, તો તમે જે ચાહો તે શીખી શકો. શોખને ઉંમરનો બાદ ના હોવો જોઈએ. ઉંમર થાય, તેમ શોખનું મહત્વ વધી જાય. પુરા લગાવથી કરો. એ ખર્ચાળ હોય, તે જરૂરી નથી. મારી ૮૭ વર્ષની બહેન (શહીદા માલિક) ભરતકામની શોખીન છે. મને તંદુરસ્ત શરીરના આશીર્વાદ છે. હું રોજ ઘરે યોગ કરું છું, જે મને ચુસ્ત રાખે છે. વાઈલ્ડ લાઈફ ફોટોગ્રાફી માટે આમ પણ ટ્રાવેલિંગ કરવું પડે અને લાંબુ ચાલવું પડે.”
ઇન ફેક્ટ, મોટી ઉંમરે કેવી રીતે જીવાય, તે વહીદા પાસે શીખવા જેવું છે. ‘પ્યાસા,’ ‘કાગજ કે ફૂલ,’ ‘સાહેબ, બીબી ઔર ગુલામ,’ ‘ગાઈડ,’ અને ‘નીલ કમલ’ જેવી યાદગાર ફિલ્મોની સ્ટાર તેની સમકાલીન એક્ટ્રેસ આશા પારેખ (74) અને હેલન (81) સાથે સાથે ખાસ બહેનપણાં છે, અને ત્રણે અવારનવાર રખડવા ઉપાડી જાય છે, સિનેમા જોવા જાય છે અને ખાવા-પીવા પર ભેગાં થાય છે. વાસ્તવમાં, આ ‘ચાર ચોટલા’ હતા, પણ સાધના અને નંદા એમાંથી ‘ખરી’ પડ્યાં.
આશા પારેખ કહે છે, “હું એકલી છું અને વહીદાને બે બાળકો છે, પરંતુ’ હેલનની સાથે મેં બંને એકબીજાના સંપર્કમાં રહીએ છીએ. અમે ત્રણ જમવા માટે બહાર જઈએ છીએ અને હોલીડે પર જઈએ છીએ.” થોડા વર્ષો પહેલાં એક ઇન્ટરવ્યૂમાં વહીદાએ કહ્યું હતું કે, “ હું આ બંનેને કહેતી રહું છું કે, જાતને વ્યસ્ત રાખવા માટે તમારે સતત કશું કરતા રહેવું જોઈએ. કોક દિવસ આપણે ત્રણેએ એક નાટક કરવું જોઈએ, જેમાં આપણે આપણી જ ભૂમિકા કરીએ અને એમાં વાતો કરીએ, એકબીજાની ખીલ્લી ઉડાવીએ.”
હમણાં થોડા દિવસ પહેલાં ટ્વિંકલ ખન્નાને વહીદા રહેમાન સાથે એક નાનકડો ઈન્ટરવ્યુ સોશ્યલ મીડિયા પર પોસ્ટ કર્યો હતો. એમાં ટ્વિંકલે પૂછ્યું હતું કે, “હવે જીવનમાં શું કરવાનું બાકી રહ્યું છે?” ત્યારે વહીદાએ આંખનું મટકું માર્યા વગર કહ્યું હતું, “સ્કુબા ડાઈવિંગ.”
ટ્વિંકલ સ્તબ્ધ થઇ ગઈ, “૮૧ વર્ષની ઉંમરે સ્કુબા ડાઈવિંગ કરવું છે?”
“તો શું થયું?” વહીદાએ વળતો સવાલ કર્યો, “હું તંદુરસ્ત હોઉં, તો હું એ પણ કરી શકું.”
આ જે “તો શું થયું?” સવાલ છે, તેમાં ઢળતી ઉંમરે કેવી રીતે વ્યસ્ત અને સકારાત્મક જીવાય, તેનો મંત્ર છુપાયેલો છે.
From fb
